六月初因為阿嫲過身，所以去咗一間新嘅殯儀館辦白事。雖然講就話係新，其實只係易手，呢間殯儀館都好似有十年八年歷史。
我由細到大都係殯儀館愛好者，好中意研究呢個地方，細個無得上網，就會喺有機會出席白事時，偷雞跑來跑去，有時會走上另一層，有時會睇吓後樓梯，最過份嘅係入人哋後堂偷睇人哋先人個樣都試過。
OK呢啲都係細個嘅事，大個咗有得上網，我對殯儀館嘅認合已經涉獵到世界唔同國家，所以我由細到大，對殯儀館都無恐懼感。
六月初呢一次白事，因為嫲嫲都九十有四，笑喪氣氛大家都唔想太傷感，所以一家人都有傾有講，該做事時候就做事，點知傾傾吓，本人突然覺得急屎，就好自然行出去廁所，經過走廊時突然諗起，我好似無試過喺殯儀館屙屎，首先我唔覺得係一個里程碑，而係我有三秒閃過個廁所會唔會恐怖呢個問題，行到去廁所，原來位置喺電梯隔離，仲要打開住門加上燈火通明，應該就無問題。
我行入廁所，經過洗手盤，先撥一撥頭髮整理吓僅有嘅儀容，然後我就行入格廁A。
正當我解緊皮帶時，褲都未除，我就聽到洗手盤有人開水洗手聲。
因為由我行入廁格A到想除皮帶，過程唔過五秒，當中我無聽過有腳步聲行入嚟，但我又有諗過外面有多少雜聲，可能有人行入嚟洗個手我聽唔到，所以我戚住條皮帶，即時開門行出去掩門仔嗰個位望，水龍頭無水出，好似無人嚟過一樣。
我行為入廁所，我聽到有洗手聲，因為外面係電梯，始於係有雜聲，所以我今次將自己聽覺放喺留意尿兜嗰邊，係唔係尿兜定時沖水嘅聲，但聲源絕對唔係由尿兜方向傳嚟，係洗手盤。
我又一次起身行出去，今次都係無開水，無人。
我真心開始驚，但同時我真係急屎嘅，諗諗吓殯儀館有呢啲嘢其實我多事做乜，即時除褲做自己要做嘅事就算。
我一坐低，準備去廁所時，隻耳就開始耳鳴，我垂低頭，耳鳴愈來愈勁，開始覺得成個頭同膊頭好似有一道氣向我壓過嚟。
呢個時候感覺到好似有人行入嚟，因為耳鳴愈來愈勁，我跟本聽唔到真正嘅聲，只係徘徊感覺到聽覺，覺得有人喺圖中「人流區」度左右咁行，
係左右咁行。
呢個時候嘅我都幾趣怪，褲係除咗坐喺度，但兩隻手都係撐住廁所兩邊嘅牆，個頭垂低到差唔多掂到自己大脾，OK喇只係差唔多。
就係咁我唔知過咗幾耐，期間我只係覺得出面有好多人行來行去，係好多人，跟住慢慢我耳鳴減弱咗，耳仔終於聽到出面啲人入嚟廁所對話內容，而我亦都成頭都汗，屎再無急嘅感覺。
我有少少劫後餘生嘅感覺〈其實無咩事發生〉坐喺屎坑，再慢慢起身整理好衫褲行返出去，行到去洗手盤嗰個位時外面有好多人入電梯，其實我唔係好驚，跟住就若無其事咁行返去靈堂。
人生有好多次呢一種耳鳴加頭痛嘅感覺，有機會再寫吓。
Search